Sa bisa ng lagdaan ng Memorandum ng Unawaan sa pagitan ng Komisyon ng Wikang Filipino (KWF) at Marinduque State College (MSC) nang ika-5 ng Hunyo ay naging pang-31 Sentro ng Wika at Kultura (SWK) ang Marinduque State College (MSC) sa buong arkipelago. Ang pirmahan ay idinaos sa Bulwagang Norberto Romualdez ng tanggapan ng KWF sa Gusaling Watson, JP Laurel, San Miguel, Maynila. Ang SWK ay nagsisilbing bukal ng pagpapa-unlad at pagpapalaganap ng pambansang wika at kultura. Kaugnay nito, ang MSC ay nadiriwang ika-65 taon ng pagkakatatag mula sa pagiging School of Arts and Trades at Institute of Science and Technology hanggang maging ganap na State College. Ang MSC ay tumataya sa pamamagitan ng Araling Pangkalinangan at Sining Marindukanon (Cultural and Arts Studies) at Office of Media and International Affairs (OMIA) para sa adhikain ng pambansang wika at kultura.
