ni: Dr. Diana Palmes Nobleza
Daan taong isinubi ang mga salita
Dito sa kubling hugis-pusong isla
Mula sa supling nina Garduke at Marina
Isisilang tadhana ng kaniyang wika.
Mga salita ay iluluwal
Wikang mag-aambag ng kalutang
Kapara ng bila-bila na maglalakbay
Sa wikang kaluluwa ng kapuluan.
Yano, Ngani, Baya, Mandin!
Marindukanon kung tawagin,
Humayo na at arugain
Wika natin ay kanlungin!
Wikang Marindukanon, wikang Filipino: mapagbago!
Baybayin, Abesedaryo, ABAKADA, at bagong alfabeto
Kaloob sa mga milenyal at bagong siglo
Pamilang na pito at walo, magkakawangis tayo
sa Java, Maori, Tahiti at wikang Polynesyo.
Mga hulagway ng diyalekto at wika
Yumayabong sa talinghaga
Sa pilantik ng dila at timyas ng kataga
Mapagpalayang wika ang panata.
Hawanin ang diwang kaalama’y inaapuhap
Manaliksik, magsulat, at maglimbag.
Manaliksik…
“May tindi ng sigasig at paghahanap
Paulit-ulit, walang kaliligtaan
Hanggang karunungan
ay mapanghawakan”
Magsulat…
Sumagwan sa agos ng kasaysayan
at bagong tuklas na kaalaman
Haraya ay papasiklabin
Pag-iisip ay papagningasin.
Maglimbag…
Nang malinang ang kaisipan
Putulin ang sagkang
katig ng kamangmangan
Hanggang matagpuan ang kapangyarihan
Na taglay ng wikang Filipino noon pa man.
Huwag palupig sa dayuhang teksto
Pumalaot sa kalinangang Filipino.
Hawanin ang diwang kaalama’y inaapuhap
Manaliksik, magsulat, at maglimbag.
Papag-isahin ang damdamin
ng bayan ko at bayan mo.
Tinatanaw na pagbabago,
Gabay ang wikang Filipino !
Lunggating nagbibigkis matatamo
Sa wikang pambansa at katutubo
Magpunyagi at gamitin ang Filipino
Tungo sa lipunang uunlad at magbabago.
Wikang Marindukanon, wikang Filipino: mapagbago!